Þórir Hergeirsson og norska kvennalandsliðið, sem er ríkjandi Evrópumeistari, mætir m.a. heimsmeisturum Hollands og Svartfellingum í handknattleikskeppni Ólympíuleikanna í sumar sem fram fara í Japan. Dregið var í riðla í morgun.
Norðmenn og Svartfellingar voru saman í riðli í forkeppni leikanna sem fram fór fyrir hálfum mánuði. Svartfjallaland vann viðureign þjóðanna 28:23. Svartfellingar skiptu um landsliðsþjálfara í kjölfarið á forkeppninni og verður Bojana Popovic, kjölfesta silfurliðs Svartfellinga á leikunum 2012, við stjórnvölinn.
Noregur verður einnig í riðli með landsliðum Japans, Suður-Kóreu og Angóla á leikunum.
Norska landsliðið varð Ólympíumeistari undir handleiðslu Þóris á leikunum 2012 auk þess að vinna til bronsverðlauna 2016. Þórir var aðstoðarþjálfari landsliðsins þegar Noregur varð Ólympíumeistari í fyrsta sinn í kvennaflokki 2008. Alls hefur norska landsliðið unnið í sex skipti til verðlauna á Ólympíuleikum, fyrst 1988.
Svíar, sem eru í riðli með íslenska landsliðinu í undankeppni EM sem hefst í haust, drógust í B-riðil með Frökkum, Spánverjum, landsliði rússnesku ólympíunefndarinnar, Ungverjum og brasilíska landsliðinu.
Rússar eru Ólympíumeistari frá 2016. Vegna keppnisbanns rússnesks íþróttafólks þessi árin vegna lyfjamisnotkunar, þá keppir rússneska landsliðið undir fána og á ábyrgð rússnesku ólympíunefndarinnar á leikunum í sumar.
Riðlaskiptingin er þessi:
A-riðill: Holland, Svartfjallaland, Noregur, Japan, Suður-Kórea, Angóla.
B-riðill: Spánn, Rússneska ólympíunefndin (ROC), Ungverjaland, Svíþjóð, Frakkland, Brasilía.
