Handknattleikslið Þórs á Akureyri hefur fengið liðsstyrk fyrir átökin sem framundan eru þegar keppni hefst á nýjan leik í Grill66-deild karla á næstu dögum. Samið hefur verið við Króatann Josip Kezic.
Kezic er 31 árs gamall. Hann semur við Þór um að leika með liði félagsins út núverandi leiktíð með ákvæði um að halda áfram á næsta keppnistímabili ef áhugi og vilji verður fyrir hendi af hálfu beggja aðila.
Þór greinir frá tíðindunum á Facebook síðu sinni. Kezic er væntanlegur til landsins í dag. Kezic er er sagður geta leyst fleiri en eina stöðu á leikvellinum og eru gerðar miklar vonir um að hann styrki liðið verulega.
Þór er í fjórða sæti Grill66-deildarinnar en stöðu og næstu leiki í deildinni má sjá hér.
Ennfremur greina Þórsarar frá því að allir leikmenn liðsins fari í hraðpróf tvisvar í viku og amk jafn oft í heimapróf vegna covid til að greina hugsanlega smit innan liðsins eins fljótt og kostur er.
Fyrsti leikur Þórs í Grill66-deild karla á þessu ári verður á móti ungmennalið Hauka á laugardaginn á Ásvöllum.
