Stórskytta Aftureldingar og landsliðsmaður, Þorsteinn Leó Gunnarsson, er sagður verið undir smásjá portúgalska meistaraliðsins Porto og reyndar gott betur en það því hann hefur heimsótt félagið og rætt við stjórnendur þess. Frá þessu segir Arnar Daði, Sérfræðingurinn og umsjónamaður Handkastsins, samkvæmt heimildum í færslu á X í dag.
Arnar Daði segir að Þorsteinn Leó hafi verið ytra á dögunum og þar rætt við forráðamenn félagsins og litið á aðstæður.
Samkvæmt heimildum Sérfræðingsins hefur Þorsteinn Leó Gunnarsson verið í viðræðum við stórlið Porto frá Portúgal. Samkvæmt sömu heimildum var Þorsteinn Leó ytra á dögunum að ræða við félagið. Porto leikur í Meistaradeildinni og eru portúgalskir meistarar síðustu fjögurra ára. pic.twitter.com/dIOXxkYbI2
— Arnar Daði (@arnardadi) November 2, 2023
Porto hefur síðustu árin orðið ár eftir ár portúgalskur meistari og þar að auki leikið í Meistaradeild Evrópu.
Þekktasti handknattleiksmaður Portúgals, Carlos Resende, tók við þjálfun Porto í sumar af Svíanum Magnus Andersson.
Porto er um þessar mundir í öðru sæti portúgölsku 1. deildarinnar með, skammt á eftir Orra Freyr Þorkelssyni og félögum í Sporting Lissabon.
Þorsteinn Leó var valinn í landsliðshópinn sem mætir Færeyingum í tveimur vináttulandsleikjum í Laugardalshöll annað kvöld og á laugardaginn.
Leikirnir verða einnig sýndi í opinni dagskrá á aðalrás Sjónvarps Símans.
