Þorvaldur Örn Þorvaldsson, línumaður Vals, er með samningstilboð á borðinu frá pólska félaginu GE Wybrzeże Gdansk. Hann fór á dögunum út til Gdansk til að skoða aðstæður og æfa með liðinu.
„Ég tók tvær æfingar með þeim. Það gekk bara mjög vel. Það vantaði eitthvað í hópinn hjá þeim út af landsliðspásunni en þetta gekk vel,“ sagði Þorvaldur við handbolta.is.
Þorvaldur Örn skoðar aðstæður hjá pólsku félagsliði
GE Wybrzeże Gdansk leikur í pólsku úrvalsdeildinni og er þar í þriðja sæti um þessar mundir á eftir stórliðunum KS Iskra Kielce og Wisla Plock.
Ekki búinn að taka neinu
Þorvaldur, sem er 21 árs, var í Gdansk frá fimmtudeginum 8. til sunnudagsins 11. janúar. Leist forráðamönnum félagsins það vel á það sem hann hefur fram að færa að Þorvaldi var boðinn samningur, sem tæki gildi frá og með næsta sumri.
„Já, það er ekkert leyndarmál að ég er búinn að fá tilboð frá þeim. Ég á líka eftir að tala við Val. Samningurinn minn við Val rennur út fyrir haustið. Ég er ekki búinn að taka neinu,“ sagði hann.
Þorvaldur íhugar nú hvort hann taki samningstilboði GE Wybrzeże Gdansk eður ei.
