„Keeper.is er fjarþjálfun fyrir markverði og er hugsuð sem viðbót við þá þjálfun sem er í gangi hjá félögunum. Þjálfunin getur þá sérstaklega gagnast þeim markvörðum sem ekki fá sérþjálfun hjá sínu félagsliði eða vilja fá meiri þjálfun til að bæta færni sína,“ segir Jóhann Ingi Guðmundsson sem hefur hefur sett á laggir ásamt bróður sínum Gísla, fjarþjálfun fyrir handboltamarkverði.
Gísli og Jóhann Ingi eru þrautþjálfaðir í faginu og margreyndir markverðir auk þess sem þeir hafa árum saman unnið við markvarðaþjálfun hjá félagsliðum og landsliðum HSÍ. Jóhann Ingi er m.a. markvarðaþjálfari hjá Haukum og hjá U18 ára landsliði kvenna og Gísli er yfir markavarðarþjálfun HSÍ.
„Hjá keppers.is er allt unnið í gegnum forritið Sideline sem þjálfarar og leikmenn þekkja vel. Við leikgreinum hvern markvörð sem sækir námskeið okkar og skilum af okkur skýrslu til baka. Í henni eru greindir styrkleikar markvarðarins og hvar áskoranir hans liggja til framfara. Um leið er markvörðum vísað inn á æfingasafn (Sideline) þar sem bent er á æfingar sem eru vel til þess fallnar að bæta þau atriði sem brýnast er að laga,“ segir Jóhann Ingi og bendir á að eftirfarandi sé innifalið í þjálfuninn:
Leikgreining á markverði (5 leikir á önn). Aðgangur að sérhæfðum æfingabanka. Aðgangur að fyrirlestrum á tímabilinu s.s. hugarþjálfun, þjálffræði, tækniþjálfun og fleira. Ráðgjöf um allt sem kemur að þjálfun markvarða.
Jóhann Ingi segir að sú þjálfun sem þeir bræður bjóða upp á í gegnum keppers.is henti markvörðum hvort sem þeir njóta leiðsagnar hjá félagsliðum eða ekki. Jóhann Ingi segir að þjálfun markvarða með ýmsu móti hjá félagsliðum landsins og að keeper.is sé því góður stuðningur við þá markverði sem vilja gera betur og þau félög sem ekki ná að sinna markvörðum eins vel og hægt væri.
Þjálfuninni er skipt í tvær annir og stendur hvor þeirra yfir í fjóra mánuði. Fyrri önnin hefst 1. október og stendur til 31. janúar og sú seinni er frá 1. febrúar til 30. maí
Allar nánari upplýsingar og hvernig hægt að ná sambandi við Gísli og Jóhann Inga er að finna á vefsíðunni keppers.is.
