Amo HK, IF Sävehof og IFK Kristianstad unnu fyrri viðureignir sína í átta liða úrslitum sænsku bikarkeppninnar í handknattleik karla í dag. Íslendingar komu við sögu í öllum viðureignum.
Birgir Steinn Jónsson skoraði fjögur mörk í fjögurra marka sigri IF Sävehof á HF Karlskrona, 39:35, í Partille. Síðari leikurinn verður háður í Karlskrona miðvikudaginn 5. nóvember.
Arnór Viðarsson skoraði sjö mörk og var markahæstur leikmanna HF Karlskrona ásamt Isak Larsson.
Einar Bragi Aðalsteinsson skoraði ekki mark fyrir IFK Kristianstad í sigri liðsins á toppliði sænsku úrvalsdeildarinnar um þessar mundir, Hammarby, 36:32. Leikurinn fór fram í Kristianstad. Liðin mætast öðru sinni í Stokkhólmi laugardaginn 8. nóvember.
Arnar Birkir Hálfdánsson komst heldur ekki á blað hjá Amo HK í fimm marka sigri liðsins á Tyresö Handboll, 42:37, í Tyresöhallen. Síðari leikurinn verður á heimavelli Amo laugardaginn 8. nóvember.
