Þýsku liðin SC Magdeburg og THW Kiel mætast í úrslitaleiknum um bronsverðlaunin í Meistaradeild Evrópu í handknattleik í Lanxess-Arena í Köln klukkan 13 í dag. Þetta verður aðeins í annað sinn síðan úrslitahelgin var tekin upp í keppninni vorið 2010 að tvö þýsk lið mætast í leiknum um þriðja sætið. Liðin fá hvort um sig 75.000 evrur, jafnvirði um 11,2 milljónir í verðlaunafé. Tvö efstu liðin, Barcelona og Aalborg fá tvöfalda þessa upphæð, 150.000 evrur.
Fyrsta skiptið var 2011 þegar Rhein-Neckar Löwen og HSV Hamburg mættust. Síðarnefnda liðið hafði betur, 33:31. Með Rhein-Neckar Löwen á þeim tíma voru fjórir Íslendingar, Guðmundur Þórður Guðmundsson þjálfari, leikmennirnir Guðjón Valur Sigurðsson, Ólafur Stefánsson og Róbert Gunnarsson. Ólafur varð markahæstur leikmanna Rhein-Neckar Löwen með sjö mörk.
Síðast mættust þýsk lið í úrslitaleik Meistaradeildarinnar vorið 2014 þegar Flensburg, með Ólaf Gústafsson innanborðs, vann THW Kiel, 30:28. Með Kiel á þeim tíma voru auk Alfreðs Gíslasonar leikmennirnir Aron Pálmarsson og Guðjón Valur Sigurðsson.
Nú verða einnig þrír íslenski leikmenn í eldlínunni í leiknum um þriðja sætið, Gísli Þorgeir Kristjánsson, Janus Daði Smárason og Ómar Ingi Magnússon. Allir leika þeir með Þýskalandsmeisturum SC Magdeburg. Þeir töpuðu fyrir danska meistaraliðinu Aalborg Håndbold í undanúrslitaleiknum í gær, 28:26, eftir mikla spennu.
Leikurinn í dag verður jafnframt sá síðasti hjá Janusi Daða með SC Magdeburg. Eins árs samningur hans við SC Magdeburg rennur út í lok mánaðarins. Við tekur flutningur til Szeged í Ungverjalandi.
Handbolti.is er í Köln og ætlar að fylgjast með bronsleiknum í Lanxess-Arena í textalýsingu frá kl. 12.30.
