Einar Bragi Aðalsteinsson hefur skrifað undir nýjan samning við IFK Kristianstad sem gildir út næsta tímabil, til sumarsins 2027. Einar Bragi tilkynnti sjálfur um framlenginguna á sviði á „fan-zonei“ (innsk. samkomusvæði stuðningsmanna) í Kristianstad Arena þar sem Íslendingar hituðu upp fyrir fyrsta leik F-riðils á EM gegn Ítalíu í dag.
„Það besta við að spila fyrir IFK er fólkið hérna í Kristianstad,“ sagði Einar Bragi á sviðinu.
Myndasyrpa: 3.000 Íslendingar skemmta sér í Kristianstad
Einar Bragi, sem er 23 ára vinstri skytta og sterkur varnarmaður, gekk til liðs við IFK Kristianstad frá FH sumarið 2024 og er því á sínu öðru tímabili hjá félaginu. Hafði hann orðið Íslandsmeistari með FH um vorið. Áður lék Einar Bragi með uppeldisfélagi sínu HK.
IFK Kristianstad er á toppi sænsku úrvalsdeildarinnar með 28 stig eftir 17 leiki. Einar Bragi hefur verið í algjöru lykilhlutverki hjá liðinu á tímabilinu og gjarnan verið á meðal markahæstu manna í leikjum þess.
