Tímabilið er á enda hjá Örnu Sif

Landsliðskonan og lykilleikmaður Vals, Arna Sif Pálsdóttir, leikur ekki meira með Hlíðarendaliðinu á þessari leiktíð vegna þess að hún er barnshafandi. Þetta kemur fram í tilkynningu á Facebook-síðu Vals.

Fjarvera Örnu verður mikill missir fyrir Valsliðið enda ein reyndasta og fremsta handknattleikskona landsins. Arna Sif bætist á listann yfir línumenn sem ekki leika meira á leiktíðinni fyrir Val. Ragnheiður Sveinsdóttir er frá keppni vegna hnémeiðsla og fyrirliðinn Hildur Björnsdóttir er barnshafandi eins og Arna Sif.