„Okkur tókst aldrei almennilega að stríða þeim í kvöld. Svona er þetta,“ sagði Óskar Bjarni Óskarsson þjálfari Vals við handbolta.is í kvöld eftir fjögurra marka tap fyrir FH í uppgjöri toppliðanna í Olísdeild karla í handknattleik í Kaplakrika, 32:28.
„Við gerðum of marga tæknifeila í fyrri hálfleik sem varð þess meðal annars valdandi að við vorum þremur undir eftir fyrri hálfleik. Það var ekki ósanngjörn staða. Síðan byrjuðum við bara síðari hálfleik ekki nógu vel og segja má að okkur hafi aldrei tekist að ógna þeim. Það var alveg ljóst að til þess að vinna FH í Kaplakrika þá þyrftum við algjöran toppleik og það tókst okkur ekki. Við reyndum hvað við gátum,“ sagði Óskar Bjarni ennfremur.
Óskar Bjarni sagði ennfremur að Valsliðinu hafi ekki tekist að ná upp sínum besta varnarleik. „Að tapa fyrir toppliðinu með fjórum mörkum verandi óánægðir með varnar- og sóknarleik auk þess sem okkur vantar toppleik segir okkur talsvert um það sem við getum. FH er hinsvegar með heitasta liðið í dag. FH-ingar voru bara betri en við í þetta skiptið. Flóknara var það ekki,“ sagði Óskar Bjarni Óskarsson þjálfari Vals.
