Handknattleiksdeild Aftureldingar hefur skrifað undir leikmannasamninga við tvo unga leikmenn félagsins, Brynjar Búa Davíðsson og Ævar Smára Gunnarsson.
„Brynjar og Ævar eru hluti af mjög sterkum 3. flokki hjá Aftureldingu og öflugum hægri væng í liðinu. Þeir koma upp úr kraftmiklu yngri flokka starfi Aftureldingar sem nú er að skila sér upp í meistaraflokk. Báðir hafa þeir bætt sig gríðarlega á undanförnum árum,“ segir í tilkynningu Aftureldingar.
„Brynjar Búi er 17 ára og spilar sem bæði hægri hornamaður og skytta. Hann er mjög klókur leikmaður og góður spilari auk þess að vera öflugur varnarmaður.
Ævar Smári er 16 ára stórskytta enda 2 metrar á hæð. Hann er öflugur skotmaður utan af velli en að auki með góðan leikskilning og að bæta sig mikið í vörn.
Strákarnir hafa báðir verið að gera sig gildandi á meistaraflokksæfingum í vetur og stimplað sig vel þar inn. Ævar hefur spilað nokkra leiki með meistaraflokki nú þegar og styttist í að þeir tveir félagarnir spili enn fleiri leiki með meistaraflokki.“
„Þessir samningar eru mikilvægur liður í framtíðaráformum Aftureldingar en það er skýr stefna félagsins að vilja byggja liðið okkar upp á uppöldum leikmönnum til framtíðar. Fyrir ári síðan samdi handknattleiksdeildin við sjö unga leikmenn og fjölgar nú í þeim hópi. Er það von okkar og trú að Brynjar og Ævar muni stimpla sig meira og meira inn á komandi misserum og einnig að þeim ungu leikmönnum sem koma inn í meistaraflokkinn okkar muni fjölga á komandi árum,“ segir ennfremur í tilkynningu handknattleiksdeildar Aftureldingar.
