Annan daginn í röð vann U18 ára landslið Íslands í handknattleik kvenna færeyska landsliðið í sama aldursflokki þegar liðin mættust í Safamýri í dag, 27:26. Litlu mátti muna að Færeyingar öngluðu í jafntefli. Allt kom fyrir ekki eins og einhverntímann var sagt.
Fyrri hálfleikur var um margt svipaður og fyrri hálfleikur í gær. Jafnt var framan af en þegar á leið náði íslenska liðið góðri forystu sem hélst svo til loka hálfleiksins þegar staðan var 16:12.
Færeysku stúlkurnar byrjuðu seinni hálfleikinn betur og tókst um miðbik hálfleiksins að jafna metin, 20:20. Þá kom góður kafli hjá íslenska liðinu sem náði þriggja marka forystu, 24:21, sem var nesti sem dugði leikinn á enda.
Mörk Íslands: Guðrún Hekla Traustadóttir 6, Dagmar Guðrún Pálsdóttir 6, Arna Karítas Eiríksdóttir 4, Ásthildur Jóna Þórhallsdóttir 4, Ásrún Inga Arnarsdóttir 2, Ágústa Rún Jónasdóttir 2, Elísabet Millý Elíasardóttir 1, Gyða Krístín Ásgeirsdóttir 1, Lydía Gunnþórsdóttir 1.
Í markinu skiptu Ingibjörg Lovísa Hauksdóttir, Elísabet Millý Elíasardóttir og Ingunn María Brynjarsdóttir leiknum jafnt á milli sín og vörðu vel.
Stóra verkefnið hjá U 18 ára liðinu verður í ágúst þegar það fer á HM í Kína sem fram fer frá 14. til 25. ágúst.
Sjá einnig:
