Liðin þrjú úr Grill 66-deild kvenna sem taka þátt í umspili Olísdeildar kvenna bíða fram til 13. apríl eftir að umspilið hefst. Keppni í Grill 66-deild kvenna lauk á sunnudaginn var. KA/Þór vann deildina og fer án umspils upp í Olísdeildina í stað þess liðs sem fellur.
Ekki ljóst hvert verður fjórða liðið
HK, Afturelding og Víkingur eru þau þrjú lið Grill 66-deildar sem taka þátt í umspilinu ásamt næst neðsta liði Olísdeildar. Ekki liggur fyrir hvaða lið það verður. Enn eru tvær umferðir eftir óleiknar í Olísdeildinni og þrjú lið enn orðið í næst neðsta sæti Olísdeildar, ÍBV, Stjarnan og Grótta, eins og staða þeirra er um þessar mundir.
Næst síðasta umferð Olísdeildar fer fram á fimmtudaginn og síðasta umferðin 3. apríl. Þegar að keppni í Olísdeild kvenna lýkur tekur við viku æfinga- og leikjatörn hjá kvennalandsliðinu vegna leikja við ísraleska landsliðið 9. og 10. apríl í umspili næsta heimsmeistaramótsins.
Eitt er víst
Víst er að HK og Afturelding mætast í undanúrslitum umspils Olísdeildar kvenna og verður HK með heimaleikjarétt, þ.e. fyrsta viðureignin verður á heimavelli HK auk þriðju og síðustu viðureignar komi til oddaleiks.
Víkingur leikur gegn næsta neðsta liði Olísdeildar; ÍBV, Stjarnan eða Grótta. Sigurliði um undanúrslitaleikjunum mætast í úrslitaleikjum um sæti í Olísdeildinni á næstu leiktíð.
Til stendur að undanúrslitaleikir umspilsins fari fram 13., 16. og 19. apríl. Fyrsti úrslitaleikurinn er áformaður 23. apríl.
