FH-ingurinn Einar Rafn Eiðsson leikur ekki með liði sínu næstu vikur og mánuði. Hann er leið í aðgerð á öxl. Sigurgeir Árni Ægisson, framkvæmdastjóri Handknattleikdeildar FH, staðfesti þetta í samtali við handbolta.is. „Það er erfitt að fullyrða hversu lengi Einar Rafn verður frá, kannski átta vikur, plús eða mínus einhverjar vikur. Aðalatriðið er að hann nái góðum bata,” sagði Sigurgeir Árni.
Einar Rafn hlaut slæma byltu í viðureign við Hauka í Hafnarfjarðarmótinu í lok ágúst. Féll hann m.a. á öxlina. Að sögn Sigurgeirs Árna stóðu vonir til í upphafi að með sjúkraþjálfun gæti Einar Rafn jafnað sig. Annað hefur komið á daginn og nýlega mátu læknar ástandið svo að ekki væri hjá því komist að gert yrði við það sem úr skorðum hafi gengið.
Af þessum ástæðum m.a. kræktu FH-ingar í gær í Ara Magnús Þorgeirsson sem hafði rifað seglin eftir síðasta keppnistímabil.
