Úrslitakeppni efstu deildar portúgalska handknattleiksins í karlaflokki hófst á föstudaginn. Fjögur efstu liðin, Sporting, Porto, Benfica og Marítimo Madeira Andebol SAD reyna með sér. Sporting vann Benfica í höfuðborgarslag í gær, 34:30. Á föstudagskvöld lagði Porto liðsmenn Madeira Andebol, 36:29.
Þorsteinn Leó Gunnarsson skoraði þrjú mörk fyrir Porto í sigurleiknum á Madeira.
Orri Freyr Þorkelsson skoraði fjórum sinnum í sigurleik Sporting á Benfica. Þar af skoraði Hafnfirðingurinn þrjú mörk úr vítaköstum.
Stiven Tobar Valencia skoraði ekki mark fyrir Benfica.
Úrslitakeppni efstu liðanna fjögurra fer þannig fram að þau mætast tvisvar sinnum hvert og eitt. Auk þess taka þau með sér ákveðinn stigafjölda úr deildarkeppninni. Af þessu leiðir að Sporting og Porto er jöfn að stigum, með 35 stig hvort. Benfica er með 31 stig og Marítimo Madeira Andebol SAD rekur lestina með 27 stig.
Næstu leikir fara fram um næstu helgi. Sporting tekur á móti Marítimo Madeira Andebol SAD og Benfica leikur við FC Porto í Lissabon.
