Úrúgvæ, andstæðingur íslenska landsliðsins í lokaumferð riðlakeppni heimsmeistaramóts kvenna í handknattleik, er að taka þátt í þriðja sinn í lokakeppni HM, alveg eins og Ísland. Úrúgvæ vann sér fyrst þátttöku á HM 1997 sem einnig fór fram í Þýskalandi. Frumraunin á HM 1997 gekk ekki sem best. Landslið Úrúgvæ tapaði öllum viðureignum sínum og rak lestina af 24 liðum sem tóku þátt.
Einn sigur á HM 2011
Næst var Úrúgvæ með á HM 2011 í Brasilíu en þá var Ísland í fyrsta sinn með í lokakeppni HM. Landslið Úrúgvæ hafnaði þá í 20. sæti af 24 liðum eftir að hafa unnið Argentínu, 19:16, í riðlakeppninni. Hinar sex viðureignir liðsins töpuðust og flestar stórt. Ísland hafnaði í 12. sæti af 24 þjóðum á HM 2011 sem er besti árangur Íslands til þessa.
Úrúgvæ er eitt fjögurra landsliða frá Suður- og Mið-Ameríku á HM 2025. Hin eru Argentína, Brasilía og Paragvæ. Úrúgvæ er metið þriðja besta liðið af þeim fjórum.
Viðureign Íslands og Úrúgvæ hefst í Porsche Arena í Stuttgart klukkan 14.30 í dag. Sigurliðið kemst í milliriðlakeppni sem leikin verður í Dortmund 2., 4. og 6. desember. Tapliðið fer til ‘s-Hertogenbosch og leikur um forsetabikarinn og sæti 25 til 32.
Allar leika heima
Allir leikmenn landsliðs Úrúgvæ leika með félagsliðum í heimalandinu. Þrír leikmenn eru skráðir með yfir 100 landsleiki en til samanburðar má geta þess að enginn leikmaður íslenska landsliðsins hefur leikið 100 landsleiki.
Sú leikreyndasta
Leikreyndasti leikmaður landsliðs Úrúgvæ er línukonan Viviana Ferrari Lorence með 192 landsleiki. Hún er 33 ára. Mesti markahrókurinn er Martina Barreiro Guerra. Hún hefur skorað 542 mörk í 102 landsleikjum samkvæmt samantekt sem gerð var áður en HM hófst. Systir Martinu, Camilla, er einnig í landsliðinu.
Úrúgvæ hefur tapað tveimur fyrstu leikjum sínum á HM 2025, 31:19 fyrir Serbíu og 38:12 fyrir Þýskalandi. Úrúgvæar hafa tapað boltanum 54 sinnum í leikjunum tveimur.
Mætast í fyrsta sinn
Ísland og Úrúgvæ hafa aldrei mæst áður á handknattleiksvellinum í kvennaflokki. Íslenska liðið mætti Paragvæ á HM fyrir tveimur árum og vann með sex marka mun, 25:19.
Sjö leikmenn íslenska landsliðsins í dag tóku þátt í leiknum við Paragvæ í Arena Nord í Frederikshavn 9. desember 2023, (mörk innan sviga): Þórey Anna Ásgeirsdóttir (2), Hafdís Renötudóttir, Elísa Elíasdóttir (3), Sandra Erlingsdóttir (5), Elín Rósa Magnúsdóttir (1), Thea Imani Sturludóttir (2) og Díana Dögg Magnúsdóttir (2).
A-landslið kvenna – fréttasíða.
HM kvenna ”25 – dagskrá, riðlakeppni, úrslit
Landslið Íslands á HM kvenna 2025
