„Við erum alveg á fleygiferð í því að reyna að redda Sérsveitinni miðum og það lítur allt út fyrir að það sé að fara að reddast. Það kemur allt í ljós fljótlega. Við erum á fleygiferð og okkur sýnist það vera að ganga. Það skiptir okkur miklu máli,“ segir Jón Halldórsson, formaður HSÍ, í samtali við handbolta.is.
Fyrr í dag greindi Sonja Steinarsdóttur úr stuðningsmannasveitinni Sérsveitinni frá því í samtali við handbolta.is að HSÍ væri að vinna að því að verða nokkrum meðlimum sveitarinnar úti um miða á úrslitahelgi Evrópumóts karla í Herning.
HSÍ reynir að verða Sérsveitinni úti um miða – „Skandall af EHF“
Hvað finnst þér um að Ísland fái nánast enga miða á úrslitahelgina?
„Mér finnst þetta í rauninni algjörlega galið fyrirkomulagið á þessu. Að við séum að fara í 14.400 manna höll og erum með eitt prósent af miðunum. Auðvitað var hægt að kaupa miða fyrir fram en þetta á að vera allt öðruvísi. Það eiga að vera miklu fleiri miðar fyrir þessi lið.
Svo veit maður aldrei. Ekki gleyma því að við erum hérna í undanúrslitum í fimmta sinn frá upphafi. Ég er verulega ósáttur við hvernig þetta er sett upp hjá skipuleggjendum á mótinu. Við munum alveg fylgja þessu eftir þó það hjálpi okkur ekki núna.
Við ákváðum það þegar við yfirgáfum Malmö að skilja þetta allt eftir þar og setja 100 prósent fókus á leikinn, að skilja allt sem er truflandi eftir þar,“ sagði Jón Halldórsson einnig í samtali við handbolta.is.
