Hákon Daði Styrmisson leikmaður Gummersbach gerir sér góðar vonir um að fá grænt ljós til þess að mega æfa á fullu á nýjan leik með samherjum sínum eftir eina til tvær vikur. Eyjamaðurinn staðfesti þetta í skilaboðum til handbolta.is í dag. Hákon Daði sleit krossband skömmu fyrir síðustu áramót.
„Ég er að búast við að fá grænt ljós eftir næstu viku eða í þar næstu viku og megi þá byrja á fullu í handboltanum og vera útskrifaður af þessum meiðslum,“ sagði Hákon Daði.
Gangi þetta eftir er um nokkuð hraðan bata en Hákon Daði sleit krossband á æfingu 17. desember. Fjórum dögum síðan gekkst hann undir aðgerð. Strax eftir aðgerðina hófst endurhæfing sem hefur gengið að óskum. Ekki er óalgengt að hátt í ár líði frá aðgerð og þangað til æfingar mega hefjast af krafti.
Hákon Daði gekk til liðs við Gummersbach sumarið 2021. Hann var fljótur að aðlagast handboltanum í Þýskalandi og gerði það gott fyrstu mánuðina með liðinu í 2. deildinni. Hann var í hópi markahæstu leikmanna deildarinnar þegar krossbandið gaf sig. Nokkrum dögum áður Hákon Daði meiddist var hann valinn í íslenska landsliðið fyrir Evrópumeistaramótið í Ungverjalandi sem fram fór í janúar.
Gummersbach leikur í 1. deild á keppnistímabilinu sem hefst um næstu helgi. Guðjón Valur Sigurðsson er þjálfari liðsins.
Hákon Daði er samningsbundinn Gummersbach fram á mitt árið 2024.
