„Við vorum svolítið þungar á okkur í byrjun leiksins sem er kannski ekkert óeðlilegt hjá okkur þegar við eru að skipta um hlutverk og við eigum að vera stærra liðið. Það tók okkur nokkrar mínútur að átta okkur á því en þegar það var ljóst þá var aldrei nein spurning,“ sagði Elín Rósa Magnúsdóttir landsliðskona í samtali við handbolta.is í Nord Arena í kvöld eftir 23 marka sigur íslenska landsliðsins á Grænlendingum, 37:14, í fyrstu umferð keppninnar um forsetabikarinn á HM kvenna í handknattleik.
„Grænlenska liðið var á pari við það sem við reiknuðum með,“ sagði Elín Rósa sem kom inn af krafti í sóknarleikinn í síðari hálfleik í leiknum í Frederikshavn.
Að hamra járnið
„Það var bara gaman að koma inn í leikinn. Það er bara skemmtilegt að koma inn í svona leiki og fá það hlutverk að halda áfram að hamra járnið meðan það er heitt. Við vildum sýna að við værum betri og einnig að undirstrika að við höfum mikla breidd í hópnum. Það tókst,“ sagði Elín Rósa eldhress sem er eins og aðrir leikmenn íslenska landsliðsins tilbúnar í leikinn við Paragvæ á laugardaginn klukkan 17.
Fjórtán af sextán leikmönnum skoruðu fyrir íslenska liðið að þessu sinni.
„Sjálfstraustið er gott eftir þennan sigur. Næst er að búa okkur undir leikinn á laugardaginn,” sagði Elín Rósa Magnúsdóttir landsliðskona sem skoraði eitt mark í sínum 12. landsleik.
Frábær byrjun í forsetabikarnum – stórsigur á Grænlendingum
