Gunnar Magnússon, annar þjálfara karlalandsliðsins, segir að rík áhersla verði lögð á að vinna leikinn við Ísrael í Tel Aviv 27. apríl ekki síður en heimaleikinn við Eistland 30. apríl.
Íslenska landsliðinu hafi gengið illa á útivelli í undankeppni síðustu Evrópumóta og aðeins unnið þrjá leiki af síðustu 11. Af þeim sökum verði að fara af fullum þunga í leikinn við Ísrael þótt Ísraelsmenn séu fyrirfram taldir veikari andstæðingurinn í leiknum.
Höfuðmáli skiptir að vinna riðilinn til að standa sem besta að vígi þegar dregið verður í riðla fyrir lokakeppnina 10. maí í Merkur Spiel Arena í Düsseldorf.
Skiptir máli vegna forkeppni ÓL
„Við þurfum helst að vera í efsta styrkleikaflokki af fjórum þegar dregið verður fyrir EM. Við þurfum að ná mjög góðum árangri á EM til þess að eiga möguleika á að vinna okkur inn sæti í umspili Ólympíuleikana. Fá sæti verða í boði og samkeppnin um þau verður mikil. Þess vegna verðum við að vinna báða leikina sem eftir eru í undankeppninni og gera þannig allt til þess að treysta stöðu okkar,“ sagði Gunnar í samtali við handbolta.is.
Ekki sjálfgefið
„Það er hinsvegar ekkert sjálfgefið því árangur okkar á útivelli í undankeppni stórmóta á síðustu árum hefur ekki verið góður. Við erum meðvitaðir um það og þess vegna munum við taka leikinn við Ísrael mjög alvarlega. Menn eru allir á sömu blaðsíðu í þeim efnum.“
Þrír af ellefu
„Af síðustu ellefu leikjum á útivelli í undankeppni EM höfum við aðeins unnið þrjá, hafi ég talið rétt. Sú staðreynd blasir við okkur að við erum ekki nógu sterkir á útivelli í undankeppni EM. Á því verður að verða breyting,“ sagði Gunnar Magnússon ákveðinn í samtali við handbolta.is.
Sjá einnig:
Hvar stendur íslenska liðið í undankeppni EM?
Hefur unnið fyrir að fá tækifæri með landsliðinu
Báðir vildu höggva á hnútinn og ná sáttum
Björgvin Páll og Donni eru í landsliðshópnum – einn nýliði
