Eftir að hafa haft betur í deilu við þýska handknattleikssambandið og NHC Northeim hefur handknattleikslið Víðis í Garði fengið til sín Georgios Kolovos, einn af efnilegustu handboltamönnum Grikklands. Félagaskiptin rétt sluppu í gegn áður en félagaskiptaglugganum var lokað. NHC Northeim og þýska handknattleikssambandið reyndu að leggja stein í götu Víðis og Grikkjans en allt kom fyrir ekki. Naut Víðir dyggrar aðstoðar HSÍ við félagaskiptin sem m.a. fóru inn á borð Handknattleikssambands Evrópu, EHF.
Handknattleiksdeild Víðis, undir dyggri stjórn Orfeusi Andreou, tókst að vinna diplómatískan sigur með dyggri aðstoð frá HSÍ Handknattleikssamband Íslands, segir í tilkynningu félagsins.
Vinnum utan vallar sem innan
„Ég er mjög ánægður með að vinna málið því sigrar og ósigrar eiga sér ekki aðeins stað innan vallar, heldur einnig utan þeirra,“ segir Orfeusi Andreou stofnandi og formaður Víðis handboltadeildar í tilkynningu um leið og hann þakkar HSÍ kærlega fyrir mikill stuðning.
Þakkar Róberti fyrir aðstoð
„Ég vil sérstaklega þakka Róberti og HSÍ [Handknattleikssambandi Íslands] og Katerinu frá OHE [gríska handknattleikssambandinu] sem lögðust á árar með okkur og miðla af þekkingu sinnum á reglum Handknattleikssambands Evrópu, EHF.“
Loksins, loksins
„Eftir langan tíma og erfiðan tíma tókst okkur loksins að ganga frá félagaskiptum mínum frá þýska liðinu NHC Northeim, en félagið kom í veg fyrir félagaskipti mín til Frakklands og næstum því hingað til Víðis. Allt kostaði þetta mig peninga og tíma, en einnig sálarró,” segir Georgios Kolovos, leikmaðurinn sem styr stóð um.
Kolovos segir að nú sé kominn tími til að horfa til framtíðar. „Fyrir mitt leyti mun ég reyna að hjálpa á besta mögulegan hátt við að ná þeim markmiðum sem hafa verið sett! Markmiðið er aðeins eitt, sigur í öllum leikjum sem framundan eru og að fara upp um deild,“ segir Kolovos í tilkynningu handknattleiksdeildar Víðis í Garði.
Markmið Víðis er að leika í Grill 66-deild karla á næstu leiktíð.
Ferill Giorgos Kolovos: Kolovos er uppalinn hjá A.O. Faiakas og hefur keppt í fremstu röð í handbolta með PAOK, ítalska liðinu Agrigento Marsala og þýsku liðunum Eintracht Hildesheim, Bad Neustadt og NHC Northeim. Hann hefur einnig leikið með gríska landsliðinu.
Staðan í 2. deild karla í handknattleik.
