Víkingar gerðu strandhögg í Dalhúsum

Víkingar gerðu sér lítið fyrir og skelltu eina taplausa liði Grill 66-deildar karla í handknattleik, Fjölni, í kvöld í Dalhúsum í Grafarvogi, 27:24, og hafa þar með sent sterk skilaboð til annarra liða í deildinni um að þeir ætli sér að vera með í baráttunni um sæti í Olísdeildinni á næsta keppnistímabili.

Fjölnismenn, sem höfðu unnið þrjá leiki og gert eitt jafntefli fyrir viðureignina í kvöld, voru marki yfir að loknum fyrri hálfleik. Víkingar bitu í skjaldarrendur í síðari hálfleik og unnu hann með fjögurra marka mun og eru þar með komnir upp að hlið ungmennaliðs Vals í efsta sæti deildarinnar með átta stig að loknum fimm leikjum.

Mörk Fjölnis: Elvar Otri Hjálmarsson 7, Aðalsteinn Örn Aðalsteinsson 6, Alex Máni Oddnýjarson 4, Brynjar Óli Kristjánsson 2, Jón Bald Freysson 2, Jónas Eyjólfur Jónasson 1, Óðinn Freyr Heiðmarsson 1, Viktor Berg Grétarsson 1.
Mörk Víkings: Jóhannes Berg Andrason 7, Arnar Huginn Ingason 5, Ólafur Guðni Eiríksson 5, Styrmir Sigurðarson 5, Arnar Steinn Arnarsson 2, Logi Snædal Jónsson 2, Arnar Gauti Grettisson 1.