„Króatar eru með hörkulið, jafnt í vörn sem sókn auk þess að hafa góðan þjálfara. Þeir leika á heimavelli í stórri og góðri höll. Það verða læti og ég á ekki von á öðru en að þetta verði skemmtilegt,“ segir Ýmir Örn Gíslason landsliðsmaður í handknattleik í samtali við handbolta.is um leik Íslands og Króatíu á heimsmeistaramótinu sem fram fer í kvöld og hefst klukkan 19.30 í Zagreb Arena.
Skiptir miklu máli fyrir bæði lið
Íslenska liðið hefur unnið fjórar fyrstu viðureignir sína á mótinu. Króatar hafa tapað einum leik og verða að vinna í kvöld til þess að eiga möguleika á sæti í átta liða úrslitum mótsins. Að sama skapi tryggir íslenska liðið sér sæti í 8-liða úrslitum í kvöld með sigri. Króatar leika gegn Slóvenum á sunnudaginn í lokaumferðinni og Ísland mætir Argentínu kl. 14.30 þann sama dag.
Erum hörkugóðir í vörn
Ýmir Örn segir gaman að vera í baráttuleikjum. Varnarleikurinn hefur verið öflugur í síðustu leikjum og verður vonandi áfram.
„Við erum hörkugóðir í vörn, spilum vel, erum vel undirbúnir svo við vitum oft á hverju er von næst frá mótherjanum. Samvinnan milli okkar er góð, menn fórna sér hver fyrir annan. Þá myndast góð stemning sem gerir að verkum að það er erfitt fyrir andstæðingana að komast í gegnum okkur. Ofan á annað eigum við einn Viktor Gísla í markinu sem er frábært,“ segir Ýmir Örn og bætir við:
„Þegar við klæðumst íslensku landsliðstreyjunni þá kemur ekkert annað til greina en sigur. Það breytist ekki. Sama er væntanlega upp á teningnum hjá Króötum. Ég á von á frábærum leik.“
Lengra myndskeiðsviðtal er við Ýmir Örn ofar í þessar grein.
