Andri Már Rúnarsson virðist hafa sem betur fer jafnað sig af meiðslum á ökkla. Hann mætti alltént galvaskur til leiks í kvöld og lék með samherjum sínum í SC DHfK Leipzig gegn Füchse Berlin í Max Schmeling Halle í Berlín í þýsku 1. deildinni í handknattleik.
Andri Már skoraði þrjú mörk í níu marka tapi liðsins, 37:28. Hann getur þar með meiðslanna vegna vonandi mætt á æfingu með landsliðinu 27. desember en Andri var valinn í A-landsliðið á dögunum í fyrsta sinn.
Viggó Kristjánsson skoraði fimm af mörkum SC DHfK Leipzig og gaf fjórar stoðsendingar. Rúnar Sigtryggsson er þjálfari Leipzig sem er um miðja deild eins og sjá má á stöðutöflunni neðst í greininni.
Viggó er fimmti markahæsti leikmaður deildarinnar með 119 mörk.
Melsungen fór upp í fjórða sæti þýsku 1. deildarinnar með sigri á Hannover-Burgdorf á heimavelli Hannover-Burgdorf, 34:30. Arnar Freyr Arnarsson kom lítið við sögu í sóknarleik Melsungen en var með í varnarleiknum og var m.a. einu sinni vikið af leikvelli.
Elvar Örn Jónsson lék ekki með Melsungen í leiknum vegna meiðsla.
Heiðmar Felixson er aðstoðarþjálfari Hannover-Burgdorf.
Staðan í þýsku 1. deildinni:
