Eyjapeyinn Andri Erlingsson var fyrirliði 20 ára landsliðsins í handknattleik karla í gærkvöld þegar það lék við A-landslið Grænlands í vináttuleik í Safamýri. Þar með fetaði Andri í fótspor eldri systkina sinna, Söndru og Elmars, sem einnig hafa verið fyrirliðar landsliðanna.
Líklega er það einsdæmi að þrenn íslensk systkini hafa verið fyrirliðar landsliðanna í handknattleik.
Andri, sem var valinn leikmaður 8. umferðar Olísdeildar karla, er sonur Vigdísar Sigurðardóttur og Erlings Richardssonar núverandi þjálfara karlaliðs ÍBV. Bæði léku þau með íslenska landsliðunum á sínum yngri árum. Andri og systkini hans hafa þar af leiðandi ekki langt að sækja íþróttaáhugann.
Auk þess að vera efnilegur handknattleiksmaður hefur Andri sýnt mikla hæfni sem kylfingur.
20 ára landslið karla mætir grænlenska landsliðinu öðru sinni í Víkinni á morgun klukkan 13.30. Ókeypis aðgangur verður að leiknum.
