Andri Már Rúnarsson leikmaður HC Erlangen kemur til móts við íslenska landsliðið í handknattleik í München í dag og tekur þátt í síðari landsleiknum við Þýskaland í hjarta Bæjaralands á sunnudaginn. Andri Már kemur inn í stað Hauks Þrastarsonar sem meiddist í viðureigninni við Þjóðverja í gær í Nürnberg.
Haukur tognaði á lærvöðva þegar 12 til 13 mínútur voru til leiksloka gegn Þýskalandi í PSD Bank Nürnberg Arena.
„Ég hafði samband við Andra Má strax í morgun eftir ljóst var að Haukur gæti ekki verið meira með okkur. Andri er á leiðinni til okkar í München og verður með á sunnudaginn,“ sagði Snorri Steinn Guðjónsson landsliðsþjálfari í handknattleik karla þegar handbolti.is sló á þráðinn til hans.
Andri Már, sem gekk til liðs við þýska 1. deildarliðið Erlangen í sumar, hefur leikið fjóra landsleiki og skorað fjögur mörk, öll gegn Grikkjum í Laugardalshöll í mars. Þremur dögum áður lék Andri Már sinn fyrsta A-landsleik gegn Grikkjum í Chalkida.
Önnur breytingin
Þetta er önnur breytingin sem Snorri Steinn verður að gera á landsliðshópnum í vikunni vegna meiðsla. Á þriðjudaginn tognaði Sigvaldi Björn Guðjónsson á æfingu. Teitur Örn Einarsson fyllti skarð Sigvalda Björns.
Teitur Örn kallaður inn í landsliðið vegna meiðsla
