Línumaðurinn sterki hjá KA, Einar Birgir Stefánsson, meiddist illa á ökkla á 23. mínútu leiks KA og Gróttu í KA-heimilinu í kvöld. Gert var hlé á leiknum meðan hlúð var að Einari Birgi, honum komið fyrir á sjúkrabörum og borinn af leikvelli. Skammri stund síðar kom sjúkrabíll og sjúkraflutningamenn í KA-heimilið sem fluttu Einar Birgi undir læknishendur.
Ökklinn fór á mikinn yfirsnúning
Óvíst er í kvöld hversu alvarleg meiðsli Einars Birgis eru. „Ökklin á honum fór í mikinn yfirsnúning, eðlilega veit ég ekki neitt meira hvað kom fyrir. Þetta leit ekki vel út, hann er harðjaxl og miða við hvað þetta var vont þá lítur þetta ekki vel út en við vonum það besta,” sagði Jónatan Þór Magnússon í samtali við Vísir.is strax eftir leikinn í kvöld.
Þegar eru Allan Norðberg og Ólafur Gústafsson á sjúkralista KA. Ólafur hefur verið fjarverandi alla leiktíðina. Allan er á batavegi eftir slæma tognun í aftanverðu læri.
