„Það er ekkert betra en að vinna til verðlauna með bestu vinum sínum,“ sagði Andri Már Rúnarsson einn bronsmanna íslenska landsliðsins á heimsmeistaramótinu í handknattleik karla, skipað liðum 21 árs og yngri í samtali við handbolta.is í Berlín í dag eftir að íslenska landsliðið vann Serba í baráttu um bronsverðlaun á mótinu.
Langur vegur á ári
„Fyrir ári lentum við í ellefta sæti á EM og rétt náðum inn á HM. Það er langur vegur þaðan og því að vinna verðlaun á HM. En þetta er bara svo geggjaður hópur. Við höfum tekið þetta skref fyrir skref síðan og það hefur skilað okkur hingað,“ sagði Andri Már sem var burðarás í íslenska landsliðinu á mótinu.
Sigurinn á Serbum var torsóttur í dag og í raun fór ekki að hilla undir hann fyrr en á síðustu mínútunum. Ísland komst fyrst yfir í leiknum, 17:16, eftir níu mínútna leik í síðari hálfleik.
Frábær stemning
„Mjög erfið fæðing á þessu hjá okkur en við höfum margoft sýnt það að karakterinn er fyrir hendi í liðinu. Við gefumst aldrei upp. Þess utan var stuðningurinn frábær. Ég veit ekki hvort Íslendingunum fjölgaði svo mikið milli daga eða hvort Þjóðverjarnir voru með okkur í liði. Stemningin var frábær. Við drukkum hana í okkur,“ sagði Andri Már.
„Við fórum vel yfir leik okkar í hálfleik. Vörnin var að smella en við þurftum að bæta sóknarleikinn og það tókst. Það má segja allt hafi smollið áður en yfirlauk,“ sagði Andri Már Rúnarsson í sjöunda himni í samtali við handbolta.is í Max Schmeling Halle í dag.
