Karlalandsliðið í handknattleik mætir landsliði Bosníu í Laugardalshöll í fyrstu umferð undankeppni Evrópumótsins 2026 í byrjun nóvember áður en farið verður í útileik við Georgíu.
Mjög sennilegt er að leikurinn við Bosníu fari fram 6. nóvember í Laugardalshöll fremur en daginn eftir sem er hinn leikdagur fyrstu umferðar. Ástæða þess er sú að eftir viðureignina við Bosníu bíður langt ferðalag austur í Kákasusfjöll í leik við landslið Georgíu í Tíblisi laugardaginn 9. nóvember eða sunnudaginn 10. nóvember.
Eins og kom fram í gær var dregið í riðla undankeppni EM og dróst íslenska landsliðið í riðil með landsliðum Bosníu, Georgíu og Grikklands.
Næstu leikir eftir viðureignirnar við Bosníu og Georgíu verða við Grikki heima og að heiman um miðjan mars áður en farið verður til Bosníu snemma í maí. Síðasti leikur íslenska landsliðsins verður í Laugardalshöll gegn Georgíumönnum 11. maí.
Leikjaniðurröðun Íslands í 3. riðli undankeppni HM 2026: 1. umferð: 6. eða 7. nóvember 2024: Ísland - Bosnía. 2. umferð: 9. eða 10. nóvember 2024: Georgía - Ísland. 3. umferð: 12. eða 13. mars 2025: Grikkland - Ísland. 4. umferð: 15. eða 16. mars 2025: Ísland - Grikkland. 5. umferð: 7. eða 8. maí 2025: Bosnía - Ísland. 6. umferð: 11. maí 2025: Ísland - Georgía.
Tvö efstu liðin í riðlinum eru örugg um þátttökurétt á HM sem haldið verður í Danmörku, Noregi og Svíþjóð frá 15. janúar til 2.febrúar 2026.
