„Ég er fyrst og fremst vonsvikinn yfir að hafa ekki unnið leikinn eins og ætlan okkar var. Strákarnir voru vel stemmdir ekkert annað sem kom til greina hjá okkur en sigur. Því miður varð sú ekki raunin. FH-ingar voru einfaldlega betri að þessu sinni,” sagði Ásgeir Örn Hallgrímsson þjálfari Hauka í samtali við handbolta.is eftir þriggja marka tap fyrir FH, 32:29, í Hafnarfjarðarslag í Olísdeild karla í handknattleik á Ásvöllum í kvöld. Þetta var þriðja tap Hauka í röð fyrir liðum sem eru fyrir ofan þá í deildinni. Haukar eru fjórða sæti með 10 stig.
„Mér fannst margt gott vera í leik okkar, kannski tvær til þrjár klaufalegar sóknir í síðari hálfleik sem færði FH forskotið sem okkur tókst aldrei að vinna niður,” sagði Ásgeir Örn en FH náði fimm marka forskoti, 23:18, rétt um miðjan síðari hálfleikinn.
Gengu á lagið
„Í hálfleik leið mér bara nokkuð vel þótt við værum tveimur mörkum undir. Snemma í síðari hálfleik þá hökkti sóknarleikur okkar með þeim afleiðingum að FH-ingar gengu á lagið og náði því forskoti sem við vorum að berjast við að vinna niður allt til enda. Okkur tókst aldrei að ná almennilegu áhlaupi til þess að jafna leikinn,” sagði Ásgeir Örn og bætti við að það hafi vantað fleiri stopp í vörnina.
Dveljum ekki lengi við leikinn
„Við getum ekki dvalið of lengi við þennan leik. Næsti leikur verður eftir rúma viku og þá viðureign verðum við að vinna,” sagði Ásgeir Örn Hallgrímsson þjálfari Hauka í samtali við handbolta.is á Ásvöllum í kvöld. Næst leika Haukar við ÍH í Poweradebikarnum laugardaginn 18. nóvember áður en leikið verður við Selfoss í Olísdeildinni nokkrum dögum síðar.
Staðan og næstu leiki í Olísdeildinni.
Árni Bragi skoraði 12 mörk nyrðra – Aron og Jón Bjarni léku á oddi alsins
