Íslensku liðin fjögur sem áttu rétt á að skrá sig til leiks í Evrópumótum félagsliða í karlaflokki hafa sent inn þátttökutilkynningu. Frestur rennur út í dag til þess að skrá lið til þátttöku. Róbert Geir Gíslason framkvæmdastjóri HSÍ staðfesti við handbolta.is í morgun að liðin fjögur hafi þegar verið skráð til leiks.
Liðin fjögur eru: Íslandsmeistarar ÍBV, deildarmeistarar Vals, bikarmeistarar Aftureldingar og FH sem varð í öðru sæti í Olísdeild karla, deildarkeppninni.
Öll skráð í sömu keppni
Liðin eru öll skráð til leiks í Evrópubikarkeppnina. Íslandsmeistarar ÍBV, sem áttu rétt á að taka þátt í forkeppni Evrópudeildarinnar, kjósa að veðja frekar á Evrópubikarkeppnina. Gríðarlegur kostnaður fylgir þátttöku í Evrópudeildinni, ef lið komast í gegnum forkeppnina, auk þess sem mæta verður mikið strangari kröfum en í Evrópbikarkeppninni.
Síðar í þessum mánuði skýrist á hvaða stigum íslensku liðin koma inn í Evrópubikarkeppnina. Handknattleikssamband Evrópu sendir frá sér upplýsingar þegar allar umsóknir hafa verið flokkaðar og liðum raðað niður eftir styrkleikaflokkum.
Síðast með fyrir 6 árum
ÍBV, Valur og FH hafa verið reglulegir þátttakendur í Evrópukeppni félagsliða á síðustu árum. Sex ár eru hinsvegar liðin síðan Afturelding var síðast með. Afturelding var skráð til leiks haustið 2020 en varð að gefa þátttökuna upp á bátinn þegar covid19 gekk yfir eins og eldur í sinu.
Nokkuð er síðan að skráningafrestur rann út í Evrópukeppni kvenna. Íslandsmeistarar Vals hafa m.a. sett stefnuna á undankeppni Evrópudeildar kvenna í fyrsta skipti.
