Íslandsmeistarar Vals í handknattleik kvenna ætla að gera atlögu að sæti í Evrópudeild kvenna í handknattleik á næstu leiktíð, fyrst íslenskra liða. Bikar- og deildarmeistarar ÍBV hafa sent inn þátttökutilkynningu í Evrópubikarkeppnina eins og undanfarin ár.
Aðeins tvö íslensk kvennalið taka þátt í Evrópukeppni félagsliða á næsta vetri, Valur og ÍBV. Stjarnan og Fram afþökkuðu þann möguleika að taka þátt, eftir því sem fram kemur í tilkynningu HSÍ sem er milliliður í skráningu félagsliða hér á landi.
Valur er kominn á bragðið
Á síðustu árum hafa Íslandsmeistararnir látið nægja að óska eftir þátttöku í Evrópubikarkeppninni (áður Áskorendakeppnin). Valur er hinsvegar kominn á bragðið eftir reynslu karlaliðsins í vetur og sækir hiklaust um sæti í Evrópudeildinni.
Fljótlega liggur fyrir hversu mörg lið sækja um sæti í Evrópudeildinni. Þá kemur í ljós hvort ein eða tvær umferðir verði í forkeppninni eða þá hvort kvennaliði Vals verði boðið að sleppa undankeppninni og taka beint sæti í riðlakeppninni eins og karlaliðinu var boðið á síðasta hausti og Valur þáði.
Frestur til þess að skila inn þátttökutilkynningum í Evrópukeppni karla rennur út 4. júlí.
