Ísak Steinsson, markvörðurinn ungi hjá Drammen í Noregi, hefur neyðst til þess að draga sig úr íslenska A-landsliðshópnum fyrir tvo vináttulandsleiki gegn Svíþjóð síðar í vikunni. Er hann að glíma við meiðsli og getur því ekki tekið þátt í leikjunum.
Þetta kemur fram í tilkynningu frá HSÍ. Íslenska landsliðið kemur saman til æfinga í dag og hefur undirbúning fyrir leikina tvo.
Ísak, sem er tvítugur, lék sinn fyrsta A-landsleik fyrir ári síðan gegn Grikklandi og er mikið efni. Hann var einn af þremur markvörðum sem Snorri Steinn Guðjónsson valdi í leikmannahóp sinn fyrir leikina tvo gegn Svíþjóð.
Því er ekki búist við því að annar markvörður verði valinn í stað Ísaks, en þeir Viktor Gísli Hallgrímsson og Björgvin Páll Gústavsson eru fyrir í landsliðshópnum.
