Ásmundur Einar Daðason, mennta- og barnamálaráðherra, falið Lyfjaeftirliti Íslands að sinna fræðslu og forvarnarstarfi í baráttunni gegn hagræðingu úrslita í íþróttum. Þetta bætist við hlutverk Lyfjaeftirlitsins að sinna lyfjaeftirliti í íþróttum hérlendis. Þetta kemur fram í tilkynningu frá mennta- og barnamálaráðuneytinu.
Íslensk stjórnvöld hafa staðfest sáttmála Evrópuráðsins gegn hagræðingu úrslita í íþróttakeppnum sem öðlast gildi 1. apríl nk.
Við verkefni Lyfjaeftirlitsins bætist hlutverk að sinna fræðslu- og forvarnarstarfi í samstarfi við hagaðila í samræmi við sáttmála Evrópuráðsins um hagræðingu úrslita í íþróttakeppni (e. Macolin Convention). Stofnunin útbús á því sviði fræðsluefni og fyrirlestra fyrir íþróttahreyfinguna, standi fyrir fræðslufundum og þrói frekara samstarf við hagaðila.
Fellur vel saman
„Það var mikið framfaraskref þegar ráðuneytið og Íþrótta- og Ólympíusamband Íslands stofnuðu Lyfjaeftirlit Íslands. Með virkri fræðslu og eftirliti fyrirbyggjum við lyfjamisnotkun í íþróttum og stuðlum að heiðarlegri íþróttaiðkun,“ segir Ásmundur Einar Daðason, mennta- og barnamálaráðherra í fyrrgreindri tilkynningu. „Nú útvíkkum við það hlutverk með forvörnum gegn hagræðingu úrslita. Þetta rúmast vel innan sömu stofnunar enda markmiðið hið sama, að stuðla að því að íþróttir fari fram af heilindum.“
Lyfjaeftirlitið tekur þátt í alþjóðastarfi og er falið að tryggja að eftirlit og reglur hérlendis séu í samræmi við alþjóðasamninga UNESCO og Evrópuráðsins um lyfjaeftirlit og lyfjareglur Alþjóðalyfjaeftirlitsstofnunarinnar (WADA).
Umræða í Evrópu
Mikil umræða hefur verið víða í Evrópu síðustu vikur vegna meintra hægræðinga úrslita í leikjum í evrópskum handknattleik. TV2 Danmörku birti snemma í janúar hluta af skýrslu sem greiningafyrirtækið Sportradar gerði þar sem m.a. er beint sjónum að evrópskum handknattleik. Þar kom fram sterkur grunur um að úrslitum hafi verið hagrætt í handknattleik á Evrópumótum félagsliða, svo dæmi sé tekið. Hafa nokkrir dómarar verið bendlaðir við málin.
