- Auglýsing -
- Alfreð Gíslason landsliðsþjálfari Þýskalands í handknattliek karla verður án markvarðarins sterka, Andreas Wolff, örvhentu skyttunnar Franz Semper og línumannsins Johannes Golla í síðasta leiknum í undankeppni EM á morgun. Þjóðverjar mæta Tyrkjum sem er neðstir í riðlinum. Þýska liðið er í efsta sæti.
- Í stað þeirra þriggja sem fengu leyfi frá leiknum við Tyrki, sem fram fer í Porsche Arena í Stuttgart, kemur 21 árs gamall markvörður Füchse Berlin, Matthes Langhoff, og félagi hans Tim Freihöfer inn í þýska liðið auk línumanns Bergischer HC, Aron Seesing. Óvenjulegt er að leikmenn næst efstu deildar í Þýskalandi séu kallaðir inn í landsliðið en lærisveinn Arnórs Þórs Gunnarssonar hjá Bergischer hefur átt frábært tímabil.
- Danski landsliðsmaðurinn Jacob Holm hefur samið á ný við PSG í Frakklandi en um tíma stóð til að hann yfirgæfi félagið. Holm hefur að eigin mati ekki fengið næg tækifæri á þessari leiktíð. Hann vonast til að það breytist þegar landar hans Stefan Madsen og Henrik Møllgaard taka við þjálfun PSG í sumar. Þess vegna hefur Holm ákveðið að semja við PSG á nýjan leik.
- Annar danskur landsliðsmaður, Rasmus Lauge, hefur greint frá ástæðu þess að hann fór skyndilega í frí frá handbolta um miðjan febrúar af fjölskyduástæðum. Lauge sagði frá því í fyrradag að dóttir þeirra hjóna hafi komið í heiminn nærri fjórum mánuðum fyrir tímann. Síðan hafi þau búið inn á vökudeild og séu þar enn með hinni nýfæddu dóttur sem fengið hefur nafnið Anna. Enn er nokkuð í að dóttirin megi fara heim. Lauge segir útlitið orðið gott eftir þrjá mjög erfiða mánuði. Fyrir áttu Lauge-hjónin tvö börn.
- Þýskir fjölmiðlar segja frá að MT Melsungen, sem landsliðsmennirnir Arnar Freyr Arnarsson og Elvar Örn Jónsson leika með, hafi ungverska markvörðinn Laszlo Bartusz undir smásjá. Ef af samningi verður kemur Bartusz til félagsins í sumar og leysir af Svartfellinginn Nebojsa Simic sem sleit krossband í síðasta mánuði. Simic hefur um árabil verið einn besti markvörður þýsku 1. deildarinnar.
- Bartusz er 33 ára gamall og hefur aldrei leikið með félagsliði utan Ungverjalands. Hann er núna samningsbundinn Tatabánya KC.
- Verði af komu Bartusz þá stendur hann vaktina í marki Melsungen á næstu leiktíð ásamt ungum landa sínum, Kristof Palasics, sem samdi við Melsungen snemma árs.
- Auglýsing -
