- Auglýsing -
- Andri Már Rúnarsson skoraði sjö mörk og átti eina stoðsendingu þegar lið hans, SC DHfK Leipzig, og Eisenach skildu jöfn, 34:34, í þýsku 1. deildinni í handknattleik í gærkvöld í baráttu liðanna í austurhlutanum. Leikið var á í Eisenach. Rúnar Sigtryggsson er þjálfari SC DHfK Leipzig.
- Þýsku landsliðsmennirnir Luca Witzke hjá Leipzig og Marko Grgic hjá Eisenach fóru hamförum í leiknum. Witzke skoraði 13 mörk og átti sex stoðsendingar og Grgic gerði 11 mörk og gaf einnig sex stoðsendingar. SC DHfK Leipzig er í 13. sæti þýsku 1. deildarinnar með 15 stig að loknum 19 leikjum. Eisenach er í 9. sæti.
- Elmar Erlingsson og félagar í Nordhorn-Lingen gerðu einnig jafntefli í 2. deild þýska handknattleiksins. Nordhorn-Lingen-liðið ferðaðist til Dresden og mætti HC Elbflorenz. Lokatölur 31:31. Elmar skoraði tvö mörk og gaf fjórar stoðsendingar. Nordhorn-Lingen er í 6. sæti 2. deildar með 22 stig eftir 19 leiki. HC Elbflorenz er þremur stigum ofar í fimmta sæti.
- Guðmundur Bragi Ástþórsson var markahæstur hjá Bjerringbro/Silkeborg þegar liðið gerði jafntefli við Kolding, 30:30, í slag grannliðanna í Kolding í gær en bæði liði eiga sæti í dönsku úrvalsdeildinni. Guðmundur Bragi skoraði sjö mörk, þar af tvö úr vítaköstum. Einnig gaf hann þrjár stoðsendingar.
- Bjerringbro/Silkeborg er í fimmta sæti dönsku úrvalsdeildairnnar með 22 stig eftir 19 leiki. Kolding er næst neðst með átta stig.
- Dagur Gautason skoraði tvisvar í sjö marka sigri Montpellier á US Ivry, 33:26, í París í gærkvöld í frönsku 1. deildinni í handknattleik. Montpellier er í 3. sæti deildarinnar með 27 stig eftir 17 leiki.
- Grétar Ari Guðjónsson var í marki US Ivry annan hálfleikinn og varði fjögur skot, 21%. US Ivry er í neðsta sæti frönsku 1. deildarinnar með þrjú stig að loknum 17 leikjum.
- Stiven Tobar Valencia skoraði sex mörk og var með fullkomna skotnýtingu þegar lið hans Benfica vann CF Os Belenenses, 44:31, á heimavelli í portúgölsku 1. deildinni í gær. Benfica er í öðru sæti deildarinnar.
- Berta Rut Harðardóttir og Jóhanna Margrét Sigurðardóttir skoruðu eitt mark hvor þegar lið þeirra, Kristianstad HK, vann Önnereds HK, 27:18, á heimavelli í sænsku úrvalsdeildinni í gær. Kristianstad HK lyftist upp í 8. sæti með 16 stig eftir 18 leiki.
- Arnar Birkir Hálfdánsson skoraði fimm mörk fyrir Amo HK þegar liðið tapaði á útivelli fyrir Helsingborg, 38:34. Amo HK er í 12. sæti af 14 liðum sænsku úrvalsdeildarinnar með 14 stig eftir 21. umferð.
- Stöðuna í mörgum deildum evrópsks handknattleiks er að finna hér.
- Auglýsing -
