- Auglýsing -
- Einar Bragi Aðalsteinsson skoraði tvö mörk þegar IFK Kristianstad vann Alingsås HK, 34:28, á heimavelli í sænsku úrvalsdeildinni í handknattleik í gærkvöld. Kristianstad færðist upp að hlið Karlskrona og IK Sävehof í annað til fjórða sæti deildarinnar. Hvert lið hefur 17 stig eftir 14 leiki. Ystads IF er lang efst með 23 stig að loknum 13 leikjum.
- Arnar Birkir Hálfdánsson og félagar í Amo HK töpuðu fyrir Önnereds á heimavelli, 29:26, í sænsku úrvalsdeildinni í gærkvöld. Arnar Birkir skoraði sex mörk og var næst markahæstur Amo-liða. Amo HK er áfram í 12. sæti af 14 liðum deildarinnar.
- Stöðuna í sænsku úrvalsdeildinni og í fleiri deildum evrópsks handknattleiks er að finna hér.
- Tumi Steinn Rúnarsson skoraði tvö mörk átti þrjár stoðsendingar í eins marks sigri, 34:33, Alpla Hard á Handball Tirol á heimavelli í gærkvöld í austurrísku 1. deildinni í handknattleik. Hannes Jón Jónsson þjálfari Hard var á lista yfir leikmenn liðsins í leiknum. Alpla Hard er í öðru sæti deildarinnar með 20 stig eftir 13 leiki, er stigi á eftir Füchse.
- Grétar Ari Guðjónsson og liðsfélagar í US Ivry töpuðu í gærkvöld fyrir Créteil á útivelli, 27:23, í frönsku 1. deildinni í handknattleik karla. Grétar Ari var í marki Ivry í síðari hálfleik. Hann varði sex skot, þar af eitt vítakast, 32%. Darri Aronsson er frá keppni vegna meiðsla en hann er samningsbundinn Ivry en liðið er neðst í deildinni með þrjú stig eftir 13 leiki.
- Sænski handknattleiksmaðurinn Jerry Tollbring gengur til liðs við danska úrvalsdeildarliðið Ribe-Esbjerg frá og með næstu leiktíð. Tollbring er samningsbundinn Füchse Berlin fram á næsta sumar en leikur ekki oftar með liði félagsins. Hann sleit krossband í vetur. Tollbring er sambýlismaður Noru Mørk sem leikur með danska meistaraliðinu Esbjerg. Þau eiga von á sínu fyrsta barni í vor.
- Sænski handknattleiksmaðurinn Oscar Bergendahl leikur ekki með landsliðinu á HM í janúar. Bergendahl meiddist á vinstri ökkla snemma í viðureign Magdeburg og Gummersbach á miðvikudagskvöld. Magdeburg tilkynnti í gær að Bergendahl verði a.m.k. í þrjá mánuði frá keppni. Meiðsli hans eru svipuð þeim og samherji hans Ómar Ingi Magnússon varð fyrir á dögunum.
- Auglýsing -
