- Auglýsing -
- Guðmundur Bragi Ástþórsson og félagar í Bjerringbro/Silkeborg komust í gær í átta liða úrslit í dönsku bikarkeppninni í handknattleik. Bjerringbro/Silkeborg vann Kolding, 30:23, í Sydbank Arena í Kolding að viðstöddum 1.021 áhorfanda. Guðmundur Bragi skoraði eitt mark.
- Næsti leikur Bjerringbro/Silkeborg verður á laugardaginn á heimavelli við ungverska liðið Ferencváros (FTC) í fyrri umferð forkeppni Evrópudeildarinnar.
- Íslendingaliðið HF Karlskrona lagði IFK Kristianstad, 32:31, á útivelli í riðlakeppni sænsku bikarkeppninnar í gærkvöld og heldur þar með áfram í vonina um sæti í 16-liða úrslitum keppninnar.
- Ólafur Andrés Guðmundsson kunni vel við sig á gamla heimavellinum og skoraði fimm mörk fyrir Karlskrona. Dagur Sverrir Kristjánsson skoraði eitt mark en Þorgils Jón Svölu Baldursson kom aðallega við sögu í vörninni. Phil Döhler markvörður var með Karlskrona.
- Einar Bragi Aðalsteinsson hafði hægt um sig að þessu sinni og skoraði ekki mark fyrir IFK Kristianstad sem hefur fjögur stig eftir þrjá leiki eins og Vinslövs. HF Karlskrona hefur tvö stig að loknum tveimur leikjum en IFK Karlskrona rekur lestina í fjórða riðli án stiga eftir tvær umferðir.
- Tryggvi Þórisson skoraði eitt mark fyrir IK Sävehof þegar liðið vann stórsigur HK Varberg á útivelli í annarri umferð 1. riðils bikarkeppninnar í Svíþjóð í gær, 38:28. IK Sävehof hefur þar með unnið tvo fyrstu leiki sína í riðlinum, báða á útivelli og stendur fyrir vikið vel að vígi.
- Arnar Birkir Hálfdánsson skoraði tvisvar þegar Amo vann HK Lågen, 31:27, á útivelli. Amo hefur þar með unnið tvo fyrstu leiki sína í riðlakeppninni og á sæti í 16-liða úrslitum víst eins og IK Sävehof.
- Andrea Jacobsen og Díana Dögg Magnúsdóttir landsliðskonur og nýir samherjar þeirra í Blomberg-Lippe unnu í gær Dortmund, 36:24, í æfingaleik á heimavelli Blomberg. Engar upplýsingar lágu á lausu í gærkvöld hvort þær stöllur hafi tekið þátt í leiknum eða skorað. Blomberg-Lippe sækir Handballteam Norderstedt heim í fyrstu umferð bikarkeppninnar í Þýskalandi annað kvöld.
- Auglýsing -
