- Auglýsing -
- Hákun West av Teigum varð í gær fyrsti færeyski handknattleiksmaðurinn til þess að verða þýskur meistari í handknattleik karla. Hákun er örvhentur hornamaður Füchse Berlin sem vann þýska meistaratitilinn í fyrsta sinn í sögu sinni.
- Danska handboltafréttasíðan hbold.dk sagði frá því gær að færeyski landsliðsmaðurinn Elias Ellefsen á Skipagøtu gangi til liðs við danska úrvalsdeildarliðið GOG á næstu dögum. Elias hefur verið hjá Kiel í Þýskalandi í tvö ár.
- Forráðamenn GOG hafa leitað logandi ljósi síðustu daga að leikmanni til þess að fylla skarð Norðmannsins Tobias Grøndahl sem seldur var til þýska meistaraliðsins Füchse Berlin í vikunni.
- Verði af komu Ellefsen hittir hann fyrir frænda sinn Óla Mittún sem flyst frá IK Sävehof til GOG í sumar.
- Odense Håndbold vann Esbjerg, 33:28, í annarri viðureign liðanna um danska meistaratitilinn í handknattleik kvenna í gær þegar leikið var í Esbjerg. Liðin hafa unnið einn leik hvort. Oddaleikurinn fer fram í Óðinsvéum á fimmtudaginn.
- Ikast Håndbold vann bronsverðlaunin í dönsku úrvalsdeild kvenna. Liðið lagði København Håndbold öðru sinni, 30:25, í gær. Leikmenn liðanna eru þar með komnir í sumarleyfi.
- AEK Aþena heldur lífi í úrslitaeinvíginu um gríska meistaratitilinn í handknattleik karla. Eftir sigur Olympiakos í tveim fyrstu viðureignunum vann AEK á heimavelli í gær, 36:30. Næst leiða liðin saman hesta sína á þriðjudaginn.
- Franski markvörðurinn Cyril Dumoulin hefur ákveðið að láta gott heita og leggja skóna á hilluna góðu. Dumoulin er fertugur og lék 81 landsleik. Hann var m.a. í sigurliði Frakka á EM 2014 og HM 2015. Dumoulin var markvörður Nantes þegar liðið lék til úrslita og tapaði fyrir Montpellier Meistaradeild Evrópu fyrir sjö árum. Síðustu ár hefur Dumoulin verið markvörður Tremblay.
- Auglýsing -
