- Auglýsing -
- Ítalska landsliðið í handknattleik karla, sem verður einn af andstæðingum íslenska landsliðsins á EM karla í janúar, mætir Evrópumeisturum Frakklands í vináttuleik í Pau í Frakklandi í dag. Ítalska liðið hefur æft í Berlín síðustu daga undir stjórn Bob Hanning landsliðsþjálfara sem einnig er framkvæmdastjóri þýska meistaraliðsins Füchse Berlin.
- Jonas Wille landsliðsþjálfari Noregs í handknattleik karla er sagður hafa brotið odd á oflæti sínu á fimmtudagskvöldið þegar hann lét norska landsliðið leika sjö á sex í sóknarleiknum. Wille hefur í gegnum tíðina verið gagnrýndur í Noregi fyrir að vilja ekki brydda upp á þessu sóknarafbrigði sem margir líta hornauga. Wille hefur staðið fastur á því til þessa að leika ekki sjö á sex.
- Mun breytingin hafa komið Nikolaj Jacobsen og danska landsliðinu í opna skjöldu í viðureign liðanna á móti í Þrándheimi á fimmtudagskvöld. Jacobsen viðurkennir í samtali við danska fjölmiðla að hann hafi ekki búið danska landsliðið undir að Norðmenn léku sjö á sex enda ekki þekktir fyrir það. Fyrir vikið hafi danska vörnin orðið götótt. Koma það ekki að sök því Danir unnu engu að síður öruggan sigur, 38:33.
- Fargi er létt norsku landsliðskonunni Noru Mørk eftir að hálfs árs gömul dóttir hennar fékk vegabréf á dögunum. Þar með getur Mørk væntanlega tekið þátt í heimsmeistaramótinu sem fram fer í Hollandi og Þýskalandi síðar á þessu ári. Nokkrar flækjur voru leystar áður en hægt var að fá vegabréf fyrir dóttur Mørk. Barnið fæddist í Danmörku en móðirin er norsk og faðirinn sænskur með heimili í Danmörku.
- Mørk hafði áður sagt að hún ætlaði sér ekki að taka þátt í HM með norska landsliðinu nema að hún gæti hitt dóttur sína meðan á mótinu stendur en það stendur yfir í á þriðju viku.
- Auglýsing -
