Ólafur Andrés Guðmundsson skoraði ekki mark fyrir HF Karlskrona þegar liðið tapaði með eins marks mun fyrir HK Malmö, 25:24, í upphafsleik 3. umferðar sænsku úrvalsdeildarinnar í gær. Leikurinn fór fram í Malmö og tryggði heimaliðið sér sigurinn á elleftu stundu.
Dagur Sverrir Kristjánsson og Þorgils Jón Svölu Baldursson léku ekki með HF Karlskrona í leiknum. Phil Döhler var um stund í marki liðsins og varði 2 skot. HF Karlskrona hefur þrjú stig eftir þrjár umferðir.
Spánverjinn Guijosa Castillo hefur tekið við þjálfun karlalandsliðs Íran í handknattleik af Veselin Vujovic sem hætti fyrir nokkru síðan og tók við landsliði Katar. Castillo þekkir til mála í handknattleik í Íran eftir að hafa þjálfað landsliðið frá 2012 til 2014.
Castillo var vel þekktur handknattleiksmaður á fyrri tíð. Hann lék m.a. með Barcelona og spænska landsliðinu á síðasta áratug síðustu aldar og var m.a. valinn handknattleikskarl ársins á IHF 1999. Íranska landsliðið verður ekki með á HM í upphafi þessa árs eftir að liðinu tókst ekki að krækja í eitt af fjórum efstu sætunum á Asíumóti landsliða í upphafi þessa árs.
Franski varnarjaxlinn Karl Konan gengur til liðs við PSG næsta sumar. Konan hefur skrifað undir þriggja ára samning við Parísarliðið. Um þessar mundir er landsliðsmaðurinn leikmaður Montpellier.
