- Auglýsing -
- Ekkert varð af því að Viktor Gísli Hallgrímsson landsliðsmarkvörður og samherjar hans í Wisla Plock mættu MMTS Kwidzyn í pólsku úrvalsdeildinni í handknattleik í gær eins og til stóð. Þakið á keppnishöll MMTS Kwidzyn hriplak vegna mikilla rigninga. Þess vegna var ekki annað að gera en slá leiknum á frest.
- Janus Daði Smárason skoraði tvisvar fyrir Pick Szeged þegar liðið vann fjórðu viðureign sína í ungversku 1. deildinni í handknattleik í gær. Pick Szeged sótti Dabas KC heim og vann með níu marka mun, 38:29.
- Óðinn Þór Ríkharðsson skoraði fjögur mörk og var með fullkomna skotnýtingu þegar lið hans Kadetten Schaffhausen vann TSV St. Otmar St. Gallen, 34:26, í svissnesku A-deildinni í handknattleik í gær. Kadetten hefur unnið þrjá af fyrstu fjórum leikjum sínum í deildinni.
- Arnór Snær Óskarsson og félagar í Rhein-Neckar Löwen fara vel af stað í þýsku 1. deildinni í handknattleik. Í gær unnu þeir nýliða Bietigheim, 33:25, á útivelli í annarri umferð. Arnór Snær skoraði ekki mark en átti eina stoðsendingu.
- Elmar Erlingsson kom lítið við sögu hjá Nordhorn-Lingen þegar liðið tapaði með 10 marka mun, 35:25, í heimsókn til GWD Minden í 2. deild þýska handknattleiksins í gær. Elmar skoraði ekki mark né átti stoðsendingu samkvæmt tölfræði leiksins.
- Balingen-Weilstetten tapaði naumlega, 29:28, fyrir TV Hüttenberg á útivelli í gærkvöld í þýsku 2. deildinni í handknattleik. Paul Kompenhans skoraði sigurmark Hüttenberg þegar 24 sekúndur voru til leiksloka. Daníel Þór Ingason var ekki í leikmannahópi Balingen í leiknum.
- Stöðuna í þýsku 2. deildinni og fleiri deildum í Evrópu er að finna hér.
- Auglýsing -
