- Auglýsing -
- Viktor Gísli Hallgrímsson fór hamförum í marki Barcelona í gær þegar liðið vann Bada Huesca, 40:29, á útivelli í spænsku 1. deildinni í handknattleik. Viktor Gísli var allan leikinn í marki Barcelona og varði 22 skot, 44%. Þetta var tíundi sigur Barcelona í deildinni í vetur og er liðið efst eins og gefur að skilja þegar 10 leikjum er lokið.
- Orri Freyr Þorkelsson skoraði 12 mörk fyrir Sporting í gær þegar liðið van Avanca, 57:28, í efstu deild porúgalska handknattleiksins. Ljóst er á tölunum að nánast um skrípaleik var að ræða. Sporting hefur unnið tólf fyrstu leiki sína í deildinni og situr í efsta sæti.
- Úlfar Páll Monsi Þórðarson skoraði eitt mark þegar lið hans RK Alkaloid gerði jafntefli á útivelli við meistarana, Eurofarm Pelister, 26:26, í 14. umferð úrvalsdeildarinnar í Norður Makedóníu í gær. RK Alkaloid er í fjórða sæti deildarinnar með 21 stig. Vardar er efst með 25 stig og Pelister með 22 stig.
- Arnór Atlason stýrði TTH Holstebro til sigurs á Nordsjælland, 30:23, í dönsku úrvalsdeildinni í gær. Leikið var á Sjálandi. Jóhannes Berg Andrason skoraði tvö mörk fyrir TTH Holstebro sem færðist upp í fjórða sæti deildarinnar með 17 stig eftir 14 leiki.
- Sveinn Jóhannsson skoraði ekki mark fyrir Chambéry þegar liðið tapaði fyrir PSG, 33:26, í París í gær í frönsku 1. deildinni í handknattleik. Sveinn lék með í 22 mínútur og átti tvö markskot sem geiguðu. Chambéry er í 6. sæti með 13 stig eftir 12 leiki, 11 stigum á eftir PSG sem er efst.
- Benedikt Gunnar Óskarsson skoraði þrjú mörk og gaf tvær stoðsendingar þegar lið hans Kolstad vann Halden HK, 29:23, í norsku úrvalsdeildinni í gær á útivelli. Sigvaldi Björn Guðjónsson skoraði eitt mark fyrir Kolstad. Sigurjón Guðmundsson markvörður sat á bekknum allan tímann.
- Kolstad er í öðru sæti með 20 stig eftir 11 leiki og er stigi á eftir Elverum sem er með 21 stig en hefur leikið einum leik fleira.
- Dagur Gautason skoraði þrisvar í fimm marka tapi ØIF Arendal á heimavelli fyrir Bækkelaget, 27:22, í norsku úrvalsdeildinni í gær. Arendal er í 11. sæti af 14 liðum með 8 stig eftir 12 leiki.
- Tjörvi Týr Gíslason skoraði þrjú mörk fyrir HC Oppenweiler/Backnang þegar liðið tapaði fyrir Vfl Potsdam í 2. deild þýska handknattleiksins á heimavelli í gær, 38:34. HC Oppenweiler/Backnang er áfram neðst í deildinni með tvö stig eftir 13 leiki.
- Auglýsing -
