„Þetta var geggjuð liðsframmistaða hjá strákunum. Orkan í strákunum var mögnuð og við þurftum svo sannarlega að fara út úr okkar hefðbundna varnarleik til þess að ná þessu,“ sagði Sigursteinn Arndal þjálfari FH í samtali við samfélagsmiðla FH eftir fimm marka sigur FH-inga á Tatran Presov í fyrri viðureign liðanna í 16-liða úrslitum Evrópubikarkeppninnar í handknattleik karla í kvöld, 35:30, í Presov í Slóvakíu.
„Við fengum á okkur 12 mörk í fyrri hálfleik, þar af voru fjögur í autt markið. Þannig að vörnin var stórkostleg. Við gáfum aðeins eftir þegar leið á síðari hálfleik og Presov tókst að jafna metin, 25:25. Þá fórum við í 5/1 vörn, unnum nokkra auðvelda bolta og náðum tveggja til þriggja marka forskoti,“ sagði Sigursteinn sem var með báða fætur á jörðinni þrátt fyrir frábæran sigur.
Langar í fleiri Evrópuleiki
„Nú öndum við með nefinu, förum upp á hótel og söfnum kröftum og hugsum vel um okkur og undirbúum okkur jafnvel undir leikinn á morgun. Ef það tekst þá eigum við möguleika á að sigla sigrinum heim. Það ætlum við okkur því okkur langar svo sannarlega í fleiri Evrópuleiki,” sagði Sigursteinn Arndal ennfremur.
Síðari leikur FH og Tatran Presov hefst klukkan 19 á morgun, laugardag.
