Kolstad endurheimti efsta sæti norsku úrvalsdeildarinnar í karlaflokki í kvöld með sigri á Drammen HK í Drammen, 29:26, í hörkuleik. Ísak Steinsson markvörður og samherjar hans í Drammen HK voru þremur mörkum yfir í hálfleik, 16:13. Í síðari hálfleik kom reynslan fram hjá Kolstad-liðinu, vörnin batnaði og Nicolai Neupart markvörður varði vel.
Sigvaldi Björn Guðjónsson var atkvæðamestur Íslendinganna hjá Kolstad. Hann skoraði sex mörk. Benedikt Gunnar Óskarsson skoraði ekki að þessu sinni og Arnór Snær Óskarsson var ekki í leikmannahópnum. Sigurjón Guðmundsson, markvörður, var annar markvörður liðsins en kom ekkert við sögu, eftir því sem næst verður komist.
Ísak Steinsson varði 9 skot í marki Drammen, 27%. Oscar Larsen Syvertsen, hinn markvörður Drammen varði fjögur skot.
Espen Gommerud Våg var markahæstur leikmanna Drammen HK með sex mörk.
Sem fyrr segir er Kolstad efst í deildinni. Liðið er með 16 stig eftir átta leiki. Elverum er stigi á eftir en hefur leikið einum leik fleira.
Drammen HK er í sjötta sæti með níu stig að loknum átta viðureignum.
