„Ég er mjög sáttur við leikinn, ekki síst hversu ákveðnir við vorum frá byrjun. Eftir tapið í Eyjum á sunnudaginn þá skulduðum við alvöru frammistöðu. Henni náðum við í kvöld,“ sagði Ísak Gústafsson markahæsti leikmaður Vals í samtali við handbolta.is eftir sigurinn á Haukum í Olíseildinni í gærkvöld, 31:25. Ísak skoraði átta mörk.
Má aldrei slaka á
„Ég er einnig ánægður með að við héldum út á fullri ferð í 60 mínútur. Gegn liði eins og Haukum má aldrei slaka á, Haukar koma alltaf til baka,“ sagði Ísak sem var í fantaformi í leiknum í gærkvöld eins og fleiri leikmenn Valsliðsins.
„Stundum skora ég, stundum aðrir. Þannig gengur þetta fyrir sig. Aðalmálið er að vinna leikina,“ sagði Ísak og bætti við að hann væri mjög sáttur við umhverfið sem hann er kominn í hjá Val. Ísak gekk til liðs við félagið í sumar frá Selfossi.
