„Skiptin verða slæm fyrir son minn en væntanlega til bóta fyrir Ými Örn því líklegt er að hann fái að spila meira í sókninni hjá Göppingen en hann hefur fengið hjá Löwen. Ég veit að hann vill það, meðal annars með tilliti til landsliðsins,“ sagði Óskar Bjarni Óskarsson þjálfari Vals spurður um félagaskipti landsliðsmannsins og Valsarans Ýmis Arnar Gíslasonar á næsta sumri.
Fyrir helgina var sagt frá því að Ýmir Örn söðli um næsta sumar og gangi til liðs við Göppingen eftir fjögurra ára dvöl hjá Rhein-Neckar Löwen.
„Til viðbótar er oft gott að skipta um vettvang og takast á við áskoranir hjá öðru liði. Ýmir Örn er einn okkar besti varnarmaður og mikill leiðtogi. Ég vænti þess að skiptin verði honum til góðs þótt þetta verði ekki eins gott fyrir son minn,“ sagði Óskar Bjarni ennfremur en sonur hans er Arnór Snær Óskarsson sem gekk til liðs við Rhein-Neckar Löwen sumar sem leið. Arnór Snær er að feta sín fyrstu spor á vegi atvinnumennskunnar í Þýskalandi. Arnór Snær hefur verið undir verndarvæng Ýmis Arnar og fjölskyldu ytra.
Ekki skref til baka
Óskar segist ekki telja að Ýmir Örn sé að taka skref aftur á bak með skiptunum frá Rhein-Neckar Löwen til Frisch Auf! Göppingen.
„Alls ekki. Göppingen er frábært varnarlið. Ýmir Örn langar að bæta sig sem sóknarmaður og hjá Göppingen mun færi skapast til þess. Þannig verður Ýmir Örn ennþá sterkari leikmaður í framtíðinni,“ sagði Óskar Bjarni Óskarsson þjálfari karlaliðs Vals sem þekkt hefur Ými Örn frá barnæsku.
