„Svona er úrslitakeppnin, ekki satt? Tvö góð lið að reyna með sér og allt getur gerst,“ sagði Díana Guðjónsdóttir annar þjálfari Hauka eftir sigurinn á Fram, 27:23, að lokinni framlengingu í fyrsta undanúrslitaleik liðanna í Olísdeild kvenna í Lambhagahöll Fram í gærkvöld. Vinna þarf þrjá leiki í undanúrslitum.
Haukar voru þremur mörkum undir þegar hálf þriðja mínúta var til leiksloka, 23:20. Hafnarfjarðarliðinu tókst að að jafna metin, 23:23, og tryggja sér síðan sigur í framlengdri viðureign.
„Við höfðum bara trú á verkefninu. Leiknum lýkur ekki fyrr en leiktíminn er úti. Yngri stúlkurnar í liðinu hafa í gegnum tíðina tekið þátt í mörgum úrslitaleikjum. Þær þekkja þaðað allt getur gerst,“ sagði Díana og bætti við að Haukaliðið hafi komið með byr í seglum inn í framlenginguna.
Sjá einnig:
Myndskeið – Lokasókn Hauka og jöfnunarmarkið
Mætum brjálaðar á Ásvelli
„Við mættum einbeittar inn í framlenginguna enda er okkar markmið að selja okkur dýrt í úrslitakeppninni. Við komumst í undanúrslit í fyrra og vitum að fenginni reynslu að að mikið eftir. Það er bara einn leikur búinn af mörgum, ekkert er í hendi, allt getur gerst á móti sterku liði Fram. Næsti leikur verður á Ásvöllum á föstudaginn. Við mætum brjálaðar í þá viðureign,“ sagði kampakát Díana Guðjónsdóttir annar þjálfari kvennaliðs Hauka þegar handbolti.is hitti hana eftir sigurinn í Lambhagahöllinni í gærkvöld.
Sjá einnig:
Leikmönnum Fram féll allur ketill í eld – Haukar gengu á lagið
Olís kvenna: Úrslitakeppni, leikjadagskrá
