Ríflega 343 þúsunda kr. afgangur var af rekstri Snasabrúnar ehf, útgefanda handbolti.is árið 2023, þrátt fyrir samdrátt í tekjum. Þetta er í fyrsta sinn sem afgangur var af rekstrinum. Árið 2022 var um 434 þúsund kr. tap og nærri 600 þúsund kr. árið 2021.
Tekjur drógust saman árið 2023 frá árinu á undan og námu 8,9 milljónum kr. Skýrist það af samdrætti í auglýsingatekjum. Tekjur af sölu auglýsinga námu rúmlega 7,2 milljónum kr. í stað um 7,4 milljóna árið áður.
Framlög lesenda og velunnara stóðu nánast í stað á milli ára, voru 1,6 milljónir kr. þrátt fyrir fækkun í hópi velunnara, annað árið í röð.
Laun og launatengd gjöld námu liðlega 4,9 milljónum kr. og stóðu svo að segja í stað á milli ára. Eitt stöðugildi var við útgáfuna árið 2023.
Langtímaskuldir voru engar í árslok og eiginfjárstaða bærilegri en í lok árs 2022.
Snasabrún ehf sótti ekki um rekstrarstuðning vegna einkarekinna fjölmiðla árið 2023 enda ekki talið þjóna tilgangi í ljós reynslunnar árið á undan.
Árið 2023 var þriðja heila starfsár Snasabrúnar ehf við rekstur handbolti.is sem opnaður var 3. september 2020.
Handbolti.is fékk tæplega 1,9 milljónir heimsókna árið 2023. Flettingar voru um 3,3 milljónir. Heimsóknum og flettingum fjölgaði 2023 um 50 af hundraði frá árinu 2022.
Áframhaldandi vöxtur hefur verið í lestri það sem af er ári 2024. Þar af leiðandi ríkir von hjá hjá eigendum um að áfram verði mögulegt að halda handbolta.is úti af bærilegri reisn.
Kristín B. Reynisdóttir og Ívar Benediktsson eiga Snasabrún ehf, útgefanda handbolta.is.
