„Við spiluðum virkilegan góðan leik. Það small eiginlega allt hjá okkur. Við nýttum færin mjög vel, vörnin var góð og markvarslan frábær,“ sagði Einar Jónsson þjálfari karlaliðs Fram í samtali við handbolta.is eftir 10 marka sigur á Haukaum, 32:22, í 11. umferð Olísdeildar í Ásvöllum í kvöld.
„Mér hefur þótt oft og tíðum við eiga inni betri færanýtingu í leikjum okkar og einnig varðandi markvörsluna. Lalli svaraði fyrir sig í kvöld. Hann var stórkostlegur. Að öðrum ólöstuðum þá var hann maður leiksins,“ sagði Einar en Lárus Helgi Ólafsson markvörður Fram varði 17 skot, 46%, í leiknum. Á honum strönduðu mörg skot Hauka sem áttu hreinlega enga möguleika gegn öflugu Fram-liði að þessu sinni.
Einar sagði stíganda vera í liði sínu. Það hafi leikið sex leiki í röð og unnið þá flesta. „Við erum ánægðir með þá leið sem við erum á,“ sagði Einar Jónsson þjálfari Fram í samtali við handbolta.is en liðið hefur 13 stig í fimmta sæti Olísdeildar þegar keppni er hálfnuð.
